Tuesday, December 20, 2011

我的恐佈生仔經過

10月24號
around 9pm
OMG!!! 我見紅喇!!!!!!! 等到頸都長，BB終於要出黎喇~! 等我有陣痛再去醫院!!!^^

10月25號
3:52am
沖咗個靚涼，開始有陣痛，有規律每30分鐘一次，再過多一陣就出發~!

4:12pm
都唔知阿B係咪玩野，明明係屋企都有陣痛，今朝去到醫院就連陣痛都冇埋，痴鬼線！一味見紅但痛都唔痛點生仔？

6:13pm
快d痛快d痛快d痛快d痛快d痛快d痛快d痛快d痛快d痛快d痛快d痛快d痛快d痛快d痛快d痛快d痛

10月26號 (預產期)
2:28am
真係正，冇陣痛不特止，連見紅都消失埋。原來我個肚咁舒服，阿B死都唔肯出黎....

9:36am
話說琴晚我對個進度太過upset, 所以我就同阿B談判，內容涉及恐嚇等字句，跟住就「順手」打咗個肚幾下，之後就開始feel到陣痛&見紅，真係超開心！原來阿B同佢daddy一樣，都係鐘意我惡嘅一面！依家每10~15分鐘陣痛一次，個感覺好爽！

12:34pm
岩岩訓醒，依家每5-10分鐘痛一次，正！等到我每3-5分鐘痛一次就可以上產房喇~Go Go Go!!!


4:48pm
陣痛冇乜新進展，都係訓陣話之佢


7:43pm
點解要等咁耐？


10:40pm
攪咁耐一度都未開，唔知我有冇咁長命等到十度全開呢？

10月27號 
7:59am
訓咗一晚，到依家仍然零進展，萬念俱灰....

9:35am
Daddy每隔一個鐘就打黎問我：「你痛唔痛呀？條粉腸出咗黎咪呀？」攪到我心煩意亂，好想block佢電話...

11:20am
Oh! 醫生要幫我穿羊水喇！佢話BB一定會今曰出世喎！產房唔可以用電話，我遲d再同大家報喜！Wish me luck!


12:00noon
我上到產房先知道原來QE產房又大又靚! 我settle down之後就即刻打電話俾老公叫佢即刻黎陪產，跟住姑娘就問我要唔要打無痛分娩，我話要同老公商量下先... 之後醫生就將隻手伸入我下面幫我穿羊水，雖然我好驚，但過程一d都唔痛，我突然feel到有一堆暖水係下面流出，跟住老公就到咗產房...

老公黎到之後，我就同佢講我想打無痛分娩，佢即刻打俾朋友問佢意見，之後佢就乖乖地簽咗張紙...同時間我穿咗羊水之後就開始feel到d陣痛密咗，加上姑娘又幫我落咗少少催生藥... 我唔可以再用「爽」去形容d陣痛，而係真係可以用「痛」去形容! 但呢個時侯我嘅子宮頸仍然係一度都未開...

around 1pm
自從feel到劇烈陣痛之後，我就起勢聞d「笑氣」，死都唔肯放手，聞到我ring ring地，好似拍咗丸仔咁，連姓乜都唔知... 係呢個時候麻醉師就到咗準備同我打無痛分娩...


around 1:30pm
麻醉師一到咗產房就同我講要係我尾龍骨度打麻醉針，之前我一直好驚因為係尾龍骨度打針一定會痛到癲! 但果時d陣痛的確好痛，所以我二話不說就答佢話：「好呀! 唔該拿拿聲吖!」跟住姑娘再三提醒我打針時一定唔可以郁，一郁咗我就會有危險 ( i.e. 如果支針打咩咗，我就會半身不遂...) 可能果時個肚實在太痛喇，所以我完全feel唔到打針時有任何痛楚! 但我就聞「笑氣」聞到high晒，過程斷晒片，完全唔記得我係度生緊仔，所以我就係神智不清下郁咗一下!!! 不過好彩有姑娘禁住我咋! 俾姑娘訓導之後，我就不斷同自己講：唔好郁，一定唔可以再郁...

‎around 2pm 
麻醉師係我尾龍骨度打咗支針後，就插咗條好幼嘅管係我尾龍骨度，作輸送麻醉藥之用。約15分鐘之後，我完全feel唔到d陣痛，真係好舒服，簡直有死過翻生嘅感覺! 跟住姑娘就開咗LCD大電視俾我睇，呢一日係我有生以來第一次覺得「都市閒情」係咁好睇架! 隔咗冇耐，姑娘同我講話我嘅子宮頸已經開到5度喇! 哇! 超開心呀! 估唔到我嘅子宮頸一開就由0度跳到5度! 仲係一d都唔痛添!!! 之後我就繼續同老公睇電視傾下計，跟住我地兩個就係咁訓着咗...

around 5pm
過咗3個鐘，姑娘叫醒我地，同我講咗一個好消息同一個壞消息。好消息係我嘅子宮頸已經開到8度喇! 而壞消息係要同我停晒d麻醉藥，我要準備痾阿B出黎!!! 果一刻真係驚到癲咗! 因為我嘅子宮頸由0度開到8度我一d都唔痛，依家一黎就要feel到第8級嘅痛楚，好驚呀!!!!!!!!!!!!!!!!!!!

停咗藥大約15分鐘之後，我開始feel到痛! 肚痛係我意料之內，但係真係估唔到最痛係我條腰同隻右腳!!! 痛到好似俾人用十把菜刀斬緊咁!!! 助產士話BB雖然個頭向下，但塊面就向上 (BB塊面suppose應該向下)，所以BB就壓住我條腰同隻右腳嘅神經線，攪到我痛到失晒控，癲咗!!! 老公見狀即刻同我隻腳按摩，但我就一邊痛一邊鬧佢點解一開始唔俾我開刀生！之後我連恥骨都痛埋，簡直係痛不欲生!!! 我終於都明白到點解d大肚婆會係產前病房痛到叫救命，我當時就話有冇咁誇張呀? 原來真係會痛到叫救命架!!! 雖然我冇叫救命，但我就忍唔住喊咗出黎...老公見狀就好驚，因為佢知道我不嬲都好忍得痛，依家我痛到喊，攪到佢好鬼緊張！就係咁痛咗2個鐘，我嘅子宮頸終於開到10度，可以準備痾BB出黎喇！

around 7pm
助產士Peggy首先係我嘅陰道口剪咗一下，跟住就要我一feel到有急屎嘅感覺就出力痾BB出黎。頭3次出力痾都唔得，老公話剩係可以見到BB啲頭髮...

7:31pm
最後再用多幾次力就痾咗BB出黎!!! 我即刻向下望，見到BB時更激動得落淚! BB出世時已經張開雙眼，見到老公時更向他撒尿呢! HAHA!!! 之後姑娘立即送BB去沖涼，而我就要繼續痾個胎盤出黎。當我見到自己嘅胎盤時嚇了一跳，size竟然跟BB的頭一樣大! 之後助產士在我的陰道口打了麻醉針再縫了幾針，跟住姑娘就俾返BB我抱，再同我地一家三口影全家幅。果一刻真係好感動! 不禁驚嘆生命真奇妙! 
Posted by at
Labels:

44 comments:

  1. ξ.×啤啤熊寶寶×﹏→×Grace媽媽December 20, 2011 at 1:57 PM

    原來生BB咁恐怖!!!我好驚呀!!!想放棄唔想生!!!
    你寫得好詳細!!!
    等我拎D經驗!!!
    我係FB友:雅文!!!
    有時間記得同朗朗影多D相呀!!!

    ReplyDelete
  2. アミちゃんDecember 20, 2011 at 4:48 PM

    好驚.............

    ReplyDelete
  3. abebeDecember 20, 2011 at 5:21 PM

    寫得好詳細呢, 抱住bb果刻一定係咩痛都唔記得晒, 好感動滿足~~~~恭喜恭喜~~^^

    ReplyDelete
  4. JINGLE BELLDecember 20, 2011 at 5:47 PM

    唔生 B 都唔知原來生 BABY 真係十級痛, 生左 B 就真係感受到自己媽咪以前幾辛苦生自己, 仲對自己啊媽好左好多, 不過生果陣幾痛都好, 見到自己個 B, 咩都唔記得哂, 幾痛都值得嘅! 而且好快就會忘記左生仔果種痛, 同埋好懷念大肚果陣, 同 BABY 連成一體嘅時光!

    ReplyDelete
  5. Mitsui, 牛丸December 20, 2011 at 6:05 PM

    真係好恐佈...睇完唔敢生...

    ReplyDelete
  6. 魔王太太December 20, 2011 at 6:16 PM

    好偉大啊~ 第一次睇到咁詳盡ge經過
    我都要錫媽咪多d...
    祝你地一家人健健康康!

    ReplyDelete
  7. PiaDecember 20, 2011 at 6:19 PM

    好感動, 每一個媽媽都係咁偉大!
    我都又期待又緊張自己到時會點呢?

    ReplyDelete
  8. 陳太,早安!December 20, 2011 at 6:41 PM

    謝謝你作為媽媽既分享,母愛,真係好偉大!完完全全feel到你既痛>.<!!

    ReplyDelete
  9. 文大小姐December 20, 2011 at 6:52 PM

    好驚呀......>.< 睇完真係要諗諗係咪都係開刀生好d? 母愛真真真偉大!

    ReplyDelete
  10. 小宅女-阿KDecember 20, 2011 at 6:53 PM

    恭喜晒啊!!!
    睇完你生仔經過, 我有啲擔心, 我4月預產期, 都諗住用無痛, 希望我頂得住啦~~~

    ReplyDelete
  11. Ivy Cytherea ChamDecember 20, 2011 at 6:57 PM

    一路睇都諗緊點解你仲可以咁搞笑,
    之後睇到唔再落麻醉藥果度, 就連我都好似覺得痛咁....
    媽媽真係好偉大~ ^^
    (有時我都真係唔明點解D男人死都唔俾老婆開刀, 或者真係痛果個唔係佢....-.-||,
    我成日都會同我男朋友講, 不如你自己生啦, 真係好痛GA....哈哈~)

    ReplyDelete
  12. Nip YingDecember 20, 2011 at 7:10 PM

    好驚呀!!!你話咁忍得痛都痛到din左....仲要再痛兩個鐘亞b先出黎.........睇到好驚呀><

    ReplyDelete
  13. 獅子大王December 20, 2011 at 7:14 PM

    好搞笑, 但係我覺得我自己個肚都好痛

    ReplyDelete
  14. FantaDecember 20, 2011 at 7:14 PM

    睇到好驚呀真係~~
    但終於生到真係好感動~~
    bb 一定要錫媽媽~~ >3<

    ReplyDelete
  15. PollyDecember 20, 2011 at 7:41 PM

    睇到都覺得好感動呀, 仲有2個月就到我喇, 希望到時可以順順利利啦~~

    ReplyDelete
  16. Giraffe.SanDecember 20, 2011 at 7:50 PM

    睇到我都好緊張, 好激動呀>_<, 偉大的靚媽咪!!
    祝chikbb健康活潑, 叫大小Mr. Chik日日都要錫錫妳補數^^!

    ReplyDelete
  17. Kin Yan DorisDecember 20, 2011 at 7:59 PM

    你好勁呀, 睇到好似現場直播咁...我邊睇邊緊張呢...媽媽真偉大^O^

    BB好攪笑, 一出世就向爸爸撒尿HAHA...

    祝BB健康成長, 開心快樂^O^

    ReplyDelete
  18. Amy雅文December 20, 2011 at 8:24 PM

    好傳神好詳盡0.0 媽媽真係好偉大!

    ReplyDelete
  19. jinxDecember 20, 2011 at 8:47 PM

    congrats!! 我係迫不得意開刀生, 所以我會羨慕順產生BB既媽媽, 因為其實開刀生BB對身體唔係太好~而且我覺得順產生BB對媽媽黎過係一個好難忘既回憶

    ReplyDelete
  20. 小beebeeDecember 20, 2011 at 10:06 PM

    好感動,100% feel到d 感受,2012/6我都係qe 生,咁見到你講qe產房都幾完善wor!!

    ReplyDelete
  21. 騰雞媽咪 - GEMDecember 20, 2011 at 10:39 PM

    真係好感動, 我都期望我bb 既來臨

    ReplyDelete
  22. 悠悠媽December 20, 2011 at 11:02 PM

    好感動啊!

    ReplyDelete
  23. JackmilaDecember 20, 2011 at 11:30 PM

    恭喜你啦~ 推左大肚咁耐~ 辛苦啦媽媽

    ReplyDelete
  24. 盧汶汶December 20, 2011 at 11:43 PM

    阿b 一出來就好精靈, 點痛都抵返啦....(不過你真係寫得好傳神, 搞到我有d 驚 ><)

    ReplyDelete
  25. BecDecember 21, 2011 at 12:35 AM

    Your title has freaked me out... I'm so scared now >_<''!!!!! I'll do epidural as well, quite afraid of the time before having it and the time when it needs to stop...... Oh no..... However looking at your adorable bb, I think everything worths... it's just a day of life that you need to suffer...

    ReplyDelete
  26. 珍妮貓December 21, 2011 at 1:44 AM

    所以幾時都話媽媽係偉大既~~睇完晒自己都好似feel到痛既感覺呀!!!

    ReplyDelete
  27. Ronnie-L 化妝箱與我 - 新娘化妝師 Bridal MakeupDecember 21, 2011 at 3:03 AM

    我一邊企地鐵！一邊睇！睇到我差d暈低，係堅想暈！

    ReplyDelete
  28. SueDecember 21, 2011 at 5:51 AM

    你真係好犀利！！我都仲考慮緊第日會唔會開刀生，真係怕頂唔住十級痛！但你個ＢＢ真係好得意，好精靈，相信見到佢應該咩痛都唔記得哂。

    ReplyDelete
  29. PhoebeDecember 21, 2011 at 6:51 AM

    笑氣真係偉大發明!我吸完第一口個時,勁想同老公講,我終於明白點解d人咁鐘意吸毒!我聞到成10度先肯放開。我痛左8個鐘先生已經覺得果8個鐘係我人生最痛苦既時候!

    ReplyDelete
  30. KiKi's ParadiseDecember 21, 2011 at 7:36 AM

    終於見到你番黎啦~
    HELLO~ LITTLE CHIK CHIK

    ReplyDelete
  31. Lousy FamilyDecember 21, 2011 at 7:47 AM

    越睇越肉緊,真係替你緊張又替你感動~

    ReplyDelete
  32. IRISDecember 21, 2011 at 10:08 PM

    睇到我超緊張呀........... 不過都要同你講句恭喜晒既.......... 祝小戚戚 身體健康 快高長大

    ReplyDelete
  33. 貓貓December 22, 2011 at 6:15 PM

    睇到好緊張呀!!恭喜晒!!

    ReplyDelete
  34. JOCIDecember 24, 2011 at 5:48 AM

    睇完好驚呀.....希望我阿b 乖乖地, 到時快d 出黎啦~~
    我真係想像唔到陣痛痛幾日既感覺呀!!

    ReplyDelete
  35. AngelDecember 24, 2011 at 8:34 PM

    望住你張全家福，真係好感動！祝你地永遠都咁幸福快樂！！

    ReplyDelete
  36. 莎拉蛋糕Sarah CakeDecember 24, 2011 at 8:56 PM

    成為媽媽, 真係一啲都唔容易呀! 好偉大呀!!!!

    ReplyDelete
  37. LittleBeDecember 28, 2011 at 9:27 PM

    睇到好緊張！但亦好感動！作為媽媽真的一點也不容易, 見到你哋嘅全家福好感動呢~ 祝你哋幸福快樂, bb 快高長大, 聽聽話話！

    ReplyDelete
  38. maggieDecember 29, 2011 at 6:11 AM

    Really Proud of Mama!!

    ReplyDelete
  39. 傻瓜‧菲December 29, 2011 at 7:09 AM

    嘩....我一路睇一路好緊張呀!!! 痛咁耐驚咁耐....做媽媽真偉大!!

    ReplyDelete
  40. 吸血疆屍的情婦December 29, 2011 at 8:31 AM

    我無打無痛針呀。不過就要打催生針。
    之後又聞笑氣又打止痛針。
    聞笑氣真係好似你甘形容，好似high 左野左。
    我同你一樣死都唔放D笑氣。
    所以話媽媽真偉大

    ReplyDelete
  41. fc620December 29, 2011 at 5:08 PM

    恭喜晒呀!!!又會咁好有得做無痛o既, 我上網睇好似好少人做到無痛呢!!!

    ReplyDelete
  42. 艾利絲January 1, 2012 at 10:14 AM

    恭喜恭喜, 媽媽真偉大!!!!!

    ReplyDelete
  43. FolleyJanuary 5, 2012 at 3:06 AM

    我睇完之後.....好驚呀!!!
    我計劃兩年後生BB....而家睇完....怕o左!!

    ReplyDelete
  44. FloraMarch 9, 2012 at 1:06 AM

    恭喜你呀!你真係好叻女呀!

    ReplyDelete

Subscribe to: Post Comments (Atom)