$1,000影結婚相中伏 - 嬲爆新娘：激到啞咗！

$1,000影結婚相中伏　
嬲爆新娘：激到啞咗！

Photos: http://www.facebook.com/pages/Photographer-IRAS-TAM/401414386564?v=wall

新郎無端端耷咗頭，真係大吉利是，唔怪得新郎都動真火話：「我冇一張相可以曬番畀啲賓客嘅！」

生命冇 take two，結婚當然亦唔想有，但最近有對新人貪平搵咗個 freelance女攝影師影結婚相，點知中晒伏！

呢位所謂攝影師 Iras影相手法另類又飄忽，效果奇差，睇到對新人眼反。結果新娘 friend為免 Iras再遺禍人間，實行喺 fb度開壇搞聲討，再人 post上高登，爸打梗係要做嘢，惡搞之餘更即時召集起底組人肉搜尋 Iras，有網友幫新娘出氣，但新娘就話：「我諗番都想喊呀！」咁又係，唔通大吉利是結多次咩！

喺二月歡喜地出嫁嘅新娘 Cecilia一心諗住婚禮慳錢唔鋪張，於是透過朋友介紹搵咗業餘攝影師 Iras影結婚相，家陣一般影結婚相市價起碼$4,000，但呢位女 photographer卻收$1,000照做，新娘 Cecilia話：「其實我睇過佢之前幫外國人影嗰輯結婚相， ok o架，咁我哋要求唔係特別高，係朋友介紹嘅，所以 offer佢$1,000幫我哋影，佢又冇話平喎，嗰日佢都係影咗兩個半鐘頭。」其實收咁平新娘都預咗輯相唔會靚到曉飛，係估唔到會差到咁！

fb友堅插

新娘 friend喺 fb聲討攝影師 Iras，雖然只係得 3百幾人 add咗，但就喺高登留言過千次，高登友仲話用手機影相靚過佢。

攝影師 Iras影相不單只唔出聲提吓啲賓客望鏡頭，仲要齋影一幅就算，影多張都冇，但 Cecilia話當場都有問過佢， Iras竟然答佢 ok！

射燈啄頭
除咗鬆郁矇，連大大支射燈都攝入鏡頭，又似惡搞又似鬼相，留念又唔係睇又激心，新娘 Cecilia話：「佢又唔肯向我哋道歉，好冇誠意又好唔尊重人。」

爆笑惡搞
高登爸打一向勁有創意，講惡搞確係好爆笑，其中一張 Iras影到對新人側埋一邊嘅相，有咁大嘅發揮空間，爸打梗係唔會嘥嘢，即刻 key圖惡搞，變成又有《富貴門》家燕姐、 8號波扮 MJ嘅無綫記者潘蔚林；仲有高達嚟賀佢哋婚禮，星光熠熠過台慶。

忍唔住喊
Iras幫 Cecilia全程影咗 230張相左右，有一半鬆郁矇外，有啲相構圖仲要超騎呢！之後交相要三催四請之餘，新娘話：「我用咗大半個月先追得番啲相，佢仲好求其咁搵張咭紙包住 CD-Rom寄過嚟，我打開啲相一睇，即時激到啞咗，我情願畢業相影得衰過結婚相，今時今日我諗番都忍唔住喊呀！」

睇完啲相嬲到震，新娘即刻搵 Iras理論，但得到嘅回覆係：「我驚唔好意思，所以冇出聲叫人望鏡頭」、「唔好意思喎，我都唔想 o架！」 Cecilia話：「佢影相嗰陣態度都有問題啦，個婚宴都未完，佢竟然當住成枱賓客問我收錢，搞到我好似冇錢畀咁。之後搵佢又成日長響，留言又唔覆，我覺得佢個態度好唔得囉！」

人哋結婚話晒係人生大事，收得平都應該專業啲，嗰位女 photographer又真係唔啱數喎！

Hea底城大畢業生
女攝影師 Iras被網友起底，原來佢喺城大讀創意媒體，年約 25歲， 07年畢業之後以 freelance形式幫人影相。佢喺 Flicker上嘅作品（左）都鍾意玩 style，而佢幫外國人影嘅結婚相（右）又唔算太差，所以俾網友鬧爆佢一係 hea影、一係嫌價低存心玩嘢。 Iras除咗喺 21號喺 blog上留言回應事件之外，一直都潛水迴避問題，之前應承新娘 Cecilia話會執 40張相補鑊，但就一直冇下文，呢啲態度又要打 300大板。

事後死撐
Iras事後向 Cecilia解釋佢影相鍾意捕捉「 lively moment」，仲暗寸大家嘅審美觀有差距喎！

專業群插
Iras收人 1,000蚊幫人影結婚相搞到一鑊粥，兩名專業人士都分別插佢未夠班，不過新娘貪平搵個業餘友影自己大日子都有責任，錯在雙方囉！

攝影師靳子森：完全唔合格
名設計師靳埭強堂弟、考獲英國皇家攝影學會會士、有 30多年攝影經驗的靳子森話：「佢嘅表現完全唔合格囉，唔應該出嚟接 job，佢學多啲嘢先啦﹗好似三個人企喺海邊嗰張相，佢都影唔啱個水平綫，構圖超級差﹗新郎耷低頭嗰張相，佢應該 delete啦，仲畀個客？作為專業攝影師佢仲有排學，佢嘅審美眼光連揀相都未得囉。」

I Do婚紗攝影謝小姐：唔好貪平
「專業嘅婚禮攝影師不單只要同客人溝通，仲要識氹啲賓客、搞氣氛。呢個女攝影師非常唔入流，佢經驗唔夠又唔 professional，真係懷疑佢未必鍾意影相，可能只係搵飯食。而呢對新人嘅安排絕對草率，鶽家好多新人會使錢搵幾個 photographer嚟影相，千祈唔好貪平呀！」

{Source from http://www.loyaukee.com/forum/viewthread.php?tid=13797}